Nú er Pabbi búinn að vera hjá okkur í rúma viku og komið að brottfarardegi. Við Anna Laufey erum enn í vorfríi en Elli byrjaði í skólanum á þriðjudaginn. Þetta hefur verið alveg yndislegt frí, við höfum aðallega slappað af. Á Laugardaginn drifum við okkur út úr bænum og keyrðum til Cincinnati. Við fórum á sædýrasafnið í Newport (sem er hinumegin við Ohio ánna og er því í Kentucy) og sáum hákarla. Við fórum líka á safn um frelsisbaráttu þræla í Bandaríkjunum. Það var mikil upplifun og gott safn.
Annars höfum við bara verið heima í rólegheitum. Við Elli notuðum tækifærið og fórum tvisvar saman út að borða og í bíó. Það kólnaði þegar pabbi kom en það hefur verið heiðskýrt og fallegt veður. Í gær hlýnaði svo og allt umhverfið lifnaði við á ný. Pabbi hefur líka farið mikið út að leika með krakkana og að hjóla með þau. Þau fóru til dæmis á hjólunum út í ísbúð í morgun. Á meðan þau voru í ísbúðinni skall á þrumuveður og hellirigning svo þau voru auðvitað rennandi blaut. Mér finnst nú líka við hæfi að himnarnir gráti daginn sem pabbi yfirgefur okkur.
Anna Laufey: Mér fannst skemmtilegast að spila við afa og fara út að hjóla.
Hæ HÆ, og takk fyrir síðast. Það var æðislegt að fá að vera með ykkur og „taka aðeins á uppeldinu“ með foreldrunum. Mér leist reyndar ekki allt of vel á þegar Anna Laufey fór með mig yfir ánna í hjólatúrnum. Hún var fljót að sjá það og spurði hvort Afi væri orðinn hræddur. Hvaðan ætli Anna Laufey hafi þessa stríðni?
En ég held að ég hafi unnið mikið oftar í Ólsen – Ólsen.
kveðja Afi