Síðasti skóladagurinn

Síðasti dagur Önnu Laufeyjar í öðrum bekk var í dag. Anna var mætt í skólann kl. 8:30 eins og venjulega. Eftir frímínútur kl 10:30 fóru allir í öðrum bekk ásamt nokkrum foreldrum gangandi í Drexel Theater til að sjá Five Children and IT. Boðið var upp á Sprite og popp með myndinni. Að sýningu lokinni var gengið hátt í 2ja mílna leið til einnar bekkjarsystur Önnu, en þar var boðið upp á leiktæki, pizzur, „dirt cup“ með ormum og rjóma, klaka, vatn, cupcakes, snakk og eitthvað fleira sem ég kann ekki að nefna. Eftir þetta var síðan gengin stuttur spölur í skólann, þar sem þau hvöddu kennarann sinn og fengu einkunnir afhentar. Reyndar átti dagskráin hjá Önnu að halda áfram með afmælisveislu eins bekkjarfélagans eftir skóla, þar sem stefnan var sett á sundlaugargarðinn í Bexley, en vegna veikinda afmælisbarnsins féll sá hluti niður. Tvennir foreldrar komu að máli við mig og fullyrtu að lokadags-dagskráin í Cassingham væri öfgakenndari en í flestum öðrum amerískum barnaskólum. Enda var það svo að á leiðinni heim með Önnu úr skólanum mátti víða sjá hoppkastala og við eitt húsið, þar sem ég veit að krakkarnir í fyrsta bekk komu saman, var uppblásin vatnsrennibraut.
En nú bíður ferð til Íslands Önnu Laufeyjar. En hún, Tómas og Jenný fara í flug á sunnudaginn. Reyndar er Anna að fara í klippingu á morgun, síðan í hádegismatarboð og hugsanlega sundferð með vinkonu sinni, síðan eru íslenskir pabbar í Columbus á leið með eldri börnin sín í dýragarðinn á laugardag, þá er tennisæfing hjá Önnu seinni part laugardags og á sunnudagsmorgun er stefnt á súkkulaðiverksmiðjusafnsheimsókn hjá Hersey’s í Pennsylvaníu. Þá er ónefndur aksturinn til Hersey’s og Baltimore áður en flugið fer og pökkun fyrir ferðalagið. Það eru því ekki miklir rólegheitadagar þessa helgina hér hjá okkur.