Heimkoma

Nú er ævintýrum fjölskyldunnar á Íslandi lokið. Reyndar var Jenný bara á Íslandi í viku, en við hin komum heim eftir fjögurra vikna ferð. Heimferðin hjá Ella og börnunum gekk mjög vel, nema að fluginu frá Boston til Columbus seinkaði um 2 klst og þar sem upphaflega áætlunin gerði ráð fyrir 7 tíma bið í Boston, þurftum við að drepa 9 klst bíðandi eftir framhaldsflugi.

Við byrjuðum biðina af krafti, tókum strætó niður á höfn, tökum leigubát (Taxi Boat) til miðborgar Boston, fengum okkur að borða á glæsilegum veitingastað í miðborginni og tókum svo neðanjarðarlestina til baka á flugvallarsvæðið og ferðuðumst með strætó frá lestarstöðinni yfir á Terminal A á Logan. Þetta ferðalag 2-3 klst og við bjuggum okkur undir 3-4 tíma bið á Logan. Við fórum því á barnaleiksvæði sem flugvöllurinn auglýsir um allan völl og er í nýbyggingu út af öryggisvæðinu á Terminal A. Svæðið fyrir börnin er eiginlega það eina sem ekki passar við hugmyndina um að allt sé stórt í Ameríku, enda fremur væskilslegt. Anna og Tómas léku þér samt á svæðinu í rúma klst þrátt fyrir að Anna væri orðin bæði of gömul og stór til að mega leika þar.

Þegar gamanið var búið og þau höfðu prílað margoft á öllu á barnasvæðinu, ákváðum við að fara á veitingastað og uppgötvuðum þá seinkunina á vélinni til Columbus. Eftir það tók síðan við bið sem er ekki í frásögur færandi, enda ekki spennandi að sitja og bíða og bíða og bíða. Reyndar tók Tómas rispu á vellinum og hóf að söngla Obama – Obamla – Obama – Obamla, meðan við feðgar fylgdumst með CNN, en söngurinn hans Tómasar kallaði fram bros hjá sumum samferðamönnum okkar.

En við komumst heim rétt um miðnætti að austurtíma eða 4:00 að íslenskum tíma, rétt um 21,5 klst eftir að ég og Anna vöknuðum um morguninn.

Jenný og börnin áttu síðan góðan dag í dag, en Jenný fór í flug til Boulder, Colorado seinnipartinn og verður fram á miðvikudagskvöld. Við munum reyna að taka lífið rólega fram yfir helgi, en þá fer Tómas í leikskólann og Anna og ég höldum áfram sundæfingum.