Allt í fullum gangi

Nú er allt komið á fullt hér í Bexleybæ, en Jenný byrjar í skólanum í dag. Þrátt fyrir að önnin mín hafi átt að vera rólegri en fyrri annir, þá er nóg að gera sér í lagi hjá Önnu. Heimavinnan hennar í skólanum er meiri en áður, sér í lagi vegna þess að hún er að taka 5. bekkjar stærðfræði, þrátt fyrir að hún sé í 4. bekk og þess utan er hún í sérkennslu fyrir börn sem standa sig sérstaklega vel í 5. bekkjar stærðfræði og í sérkennslu í ensku og bókmenntum fyrir börn með sérgáfu á því sviði. Þannig uppgötvaði ég þegar ég fór í kynningu á námsefni 4. bekkjar í skólanum hjá Önnu í síðustu viku, að hún er suma daga næstum ekkert í heimakennslustofunni sinni, en er til skiptis með fimmtu bekkjar krökkunum og í sérkennslustofunni fyrir afburðagreind börn (e. gifted children/afburðagreind er hugtakið sem Bragi Jósepsson í KHÍ notaði).
Þess utan byrjar Anna í strengjasveit Casshingham í dag, en hún hyggst læra á fiðlu. Hún æfir knattspyrnu á miðvikudagseftirmiðdögum og keppir á laugardagsmorgnum, og verður á sundnámskeiði á sunnudögum upp í OSU í október. Þetta þarf síðan að passa við önnur verkefni fjölskyldunnar, eins og námið hjá mér og Jennýju og leikskólann hans Tómasar. Að sjálfsögðu eru foreldrarnir líka í dagskrá. Við eigum ársmiða á fótboltaleiki OSU, ég spila knattspyrnu á sunnudögum, æfi flagfootball á laugardagsmorgnum og mánudagseftirmiðdögum. Jenný æfir síðan tennis reglulega. Það er e.t.v. ekki undarlegt að annað foreldrið í Bexley er yfirleitt heimavinnandi.
—
Þessi þétta dagskrá okkar merkir hins vegar að við eigum miða á OSU-Minnesota leikinn á laugardaginn, sem við getum ekki nýtt okkur. Þannig að ef einhver sem les þetta er á ferðinni í Columbus um helgina, þá hefur þú möguleika á að komast á leik á Ohio Stadium og þar sem það er alltaf uppselt á leikina, er þetta í raun einstakt tækifæri. Við erum sem sé að reyna koma miðunum í verð.