Útskrift

Þegar ég útskriftaðist í vor ákvað Jenný að gefa mér iPhone farsíma í útskriftargjöf. En fyrir þá sem ekki þekkja til er iPhone millistig á milli fartölvu og farsíma, þar sem takmörkunin á notagildi felst í ímyndunaraflinu einu. Þannig nota ég símann til að fylgjast með útgjöldum heimilisins, í honum er dagbók, þangað kemur tölvupóstur, ég get uppfært hrafnar.net, fylgst með þyngdinni minni, skráð hvað ég borða, horft á bíómyndir, notað Skype til að hringja mjög ódýrt til Íslands, hlustað á útvarp og síðan er þetta auðvitað sími. Jenný sá fljótlega hversu mikið notagildi svona sími hefur, og þegar ég svo fékk Sudoko og RISK leikina í símann langaði hana líka í svona dót, skiljanlega.

Af þeirri ástæðu einni tilkynnti Jenný mér fyrir nokkru að hún hyggðist útskrifast frá OSU um jólin með meistaragráðu, þannig að ég þyrfti að gefa henni iPhone. Reyndar ætlar hún ekki að mæta í útskriftina (en ég þurfti að gera það). Það eina sem hún þurfti að gera til að fá meistaragráðuna var að að greiða upp stöðumælasektirnar sínar, en samt sá ég mig tilneyddan til að kaupa iPhone handa henni.

Þegar ég fékk símann minn í sumar, þurfti ég að panta hann í ATT-verslun, ganga frá alskonar pappírum og bíða síðan í rúma viku þar til síminn var afgreiddur úr búðinni. Af þessum sökum ákvað ég að ganga í að kaupa símann í tíma og fór fyrir tveimur dögum á vef ATT og sá að ef ég gengi frá pöntun símans þar, fengi ég afslátt á viðbótargjaldinu sem er lagt á símaáskriftina vegna iPhone. Ég ákvað að ganga frá pöntun og gerði ráð fyrir að það myndi taka nokkra daga, síðan þyrfti væntanlega að fara í ATT-búð og láta virkja símann og Jenný myndi fá símann sinn rétt í kringum útskrift í desember, en það var ekki svo. Þrátt fyrir að á vefnum segði að síminn kæmi líklega innan 10 daga, þá kom hann á innan við 24 klst, ég þurfti einungis að hringja eitt stutt símtal í ATT og Jenný er núna í skólanum, stolt með nýja iPhone-inn sinn og það löngu fyrir útskrift.