Meistaragráða og jólatré

Það tvennt bar til tíðinda í dag að við skreyttum jólatré og ég útskrifaðist með meistaragráðu í tölfræði frá OSU.

Eins og áður hefur komið fram hér á hrafnar þá dreif ég í að fylla út þá pappíra sem þurfti til að fá MS gráðuna nú í haust. Útskriftin var í dag en ég ákvað að mæta ekki, fæ plaggið bara sent í pósti. Við fórum frekar öll saman út að borða á Cheesecake Factory og skoðuðum jólaskrautið í Easton verslunarmiðstöðinni. Við sáum líka jólasveininn bjóða uppá myndatöku en ákváðum þó ekki að taka þátt í þeim Ameríska sið. Í staðinn tókum við upp annan Amerískan sið: settum upp og skreyttum gerfi-jólatréð löngu fyrir jól. Ég er vön því að það er ekki kveikt á jólatrénu fyrr en kl 18 á aðfangadag svo það er hálf skrýtið að hafa upplýst jólatré í stofunni núna. En þar sem við yfirgefum heimilið að morgni annars í jólum þá ákváðum við að taka forskot á sæluna í þetta sinn.