Category: 01 Fjölskyldan öll

Í gær lauk Jenný síðasta kúrsinum sem hún þarf að taka til doktorsprófs í OSU. Anna Laufey kláraði skólann sinn á miðvikudaginn og rétt í þessu sendi ég inn endurskoðaða tillögu að meistararitgerðinni minni, og lauk þar með öllum verkefnum frá vormisseri (sem reyndar lauk 15. maí).

Þetta hefur þó ekki mikil áhrif á verkefnastöðuna, enda hélt Jenný í skólann í dag til að halda áfram rannsóknarvinnu og verður að fram í miðjan júlí. Anna er núna í skólanum sínum ásamt nokkrum stelpum í bekknum að hjálpa kennaranum sínum við frágang á skólastofunni fyrir sumarið og byrjar síðan á námskeiði í skapandi skrifum upp í Ohio State á mánudaginn og út júní. Ég þarf að ljúka þremur stuttum pappírum fyrir sumarnámskeið í keltískum kristnidómi í næstu viku, og þegar því er lokið taka við skrif á meistararitgerðinni (ef tillagan verður samþykkt).

Í öllu þessu heldur Tómas áfram að mæta í leikskólann, þar sem þau eru að stúdera liti næstu tvær vikur og hann þarf að mæta í réttum lit í leikskólann á hverjum degi (í dag er blár).

Þeir sem eiga heima í húsinu okkar.

[youtube=http://www.youtube.com/watch?v=UFqyxOeblwg&w=425&h=350]

Fjölskyldan fór á samtónleika allra þriggja grunnskólanna í Bexleybæ í gær. Anna lék þar með strengjasveit 4. bekkjar og stóð sig með prýði.

[youtube=http://www.youtube.com/watch?v=jYoryZxjp4s&w=425&h=350]

Rétt í þessu mældi ég Önnu og hún er orðin 150 cm.

Það má segja að í dag hafi verið merkilegur dagur fyrir sjálfstæðisbaráttu Önnu Laufeyjar, en hún fékk í fyrsta skipti að fara úr garðinum við húsið okkar til að leika sér við vin sinn. En fram til þessa hefur alltaf þurft að skipuleggja playdate og keyra hana til og frá.
Þar sem þessi breyting var fyrirsjáanleg ákváðum við auk þess að gefa Önnu farsíma, þannig að þrátt fyrir að hún færi út af svæðinu gætum við alltaf verið í sambandi við hana. Þessum breytingum á högum stúlkunnar var tekið af miklum fögnuði. Jennýju finnst hún hins vegar hafa elst um mörg ár.

Rétt í þessu gekk ég frá flugmiðum fyrir mig og börnin til Íslands í sumar. Við lendum seinnipartinn miðvikudaginn 29. júlí og verðum fram til 19. ágúst. Jenný stefnir á að koma að morgni 7. ágúst og verða fram til 19. en vegna flókinna fargjalda og enn flóknari bókunartilburða með Vildarpunktum, skattagreiðslum og eldsneytisálögum, þá tókst mér ekki að ganga frá farseðlunum hennar fyrir lokun hjá söluskrifstofu Flugleiða á Íslandi í dag.

Nú þegar afmælum er lokið þá er næsta verkefni að undirbúa sig fyrir vorfrí. Líklegast verður samt minna um frí en nafnið gefur til kynna. Þannig er Jenný á fullu í rannsóknum og ég tek próf í vikunni eftir vorfrí.
Við hyggjumst samt taka okkur eitthvert frí, og skreppa í kosningaferðalag, en nálægustu kjörræðismenn eru í Louisville í Kentucky eða Detroit, Michigan. Það er ekki ósennilegt að ferðin verði einnig notuð til að koma við í IKEA til að kaupa rúmbotn fyrir kojuna hans Tómasar en fyrir nokkrum vikum veittum við því athygli að ein spýtan í botninum hans var í sundur.
Önnur verkefni í vorfríinu eru síðan þátttaka í Íslendingakvöldi Skandínavíufélagsins og tilraun til að fara á íshokkíleik hjá Columbus Blue Jackets, en fyrr í vetur fékk ég 8 ókeypis miða út í matvörubúð, þegar ég keypti pepsidósir. Fjórir af miðunum átta voru á leik 3. mars, en vegna veikinda fórum við ekki og stefnan er því að nýta seinni fjóra miðanna síðasta sunnudaginn í mars, sem jafnframt er einn síðasti leikdagurinn keppnistímabilsins.

Fyrir 30 mínútum síðan fékk ég tölvupóst frá skólanum hennar Önnu Laufeyjar um að sérsveit lögreglunnar hefði umkringt hús á bakvið skólann og engum börnum væri hleypt út úr byggingunni af öryggisástæðum. Þar sem Anna átti að vera búin í skólanum fyrir 50 mínútum, þá taldi ég víst að hún hefði komist af stað heim áður en hamagangurinn byrjaði, en svo er víst ekki. Í bréfinu frá skólanum voru foreldrar beðnir um að koma EKKI á svæðið af öryggisástæðum. Þannig að ég hringdi í Tinu sem átti að sækja börnin í dag og henni var ekki mjög skemmt yfir ástandinu, enda var hún mætt í skólann þegar tilkynningin kom og var því læst inni ásamt Önnu og öllum öðrum nemendum skólans meðan að umsátursástand ríkir í næstu götu.

Það tók ekki langan tíma fyrir Tómas að hætta á bleyju þegar hann ákvað það. Reyndar lenti hann í smá kúkavandræðum fyrstu tvo dagana, enda aldrei notast við klósett fyrir slíkt. Eins tók eina nótt að sannfæra hann um gildi þess að notast áfram við næturbleyju.

Það sem hefur gert verkefnið þægilegra og kallað á þessi hröðu umskipti hjá Tómasi er ekki síst að á daginn er hann í gífurlegu samkeppnisumhverfi. Þannig er að félagar hans tveir Vincent og Caden, ákváðu líka að hætta á bleyju og byrja að nota klósett. Þeir fara því saman á klósettið í leikskólanum, og bera saman af miklu kappi hver sé duglegastur og ekki síst hver er með flottustu myndina á nærbuxunum sínum.

Þessi samanburður og keppni um flottustu nærbuxur dagsins hefur þannig hjálpað gífurlega og þýtt í raun að Tómas hefur lagt sig allan fram í að ná stjórn á þessu öllu sjálfur án mikilla afskipta foreldra sinna.

Það er svo sem ekki margt að frétta héðan, nema að veðrið hefur breyst svo um munar, en í dag var líklega um 12-15 stiga hiti, logn og heiðskýrt. Við fengum góða heimsókn um helgina, en Jón Víðis eða Jonni, æskufélagi úr Laugarneshverfinu var á galdrakarlaráðstefnu hér í Columbus og kíkti við með Steina frænda sínum á sunnudagseftirmiðdag.
Tómas er hættur á bleyju að eigin sögn. Ákvörðun hans kemur fremur snöggt og án mikils undirbúnings af okkar hálfu og litlar æfingar af hálfu hans. En við sjáum hvernig það gengur á næstunni.

Veðrið hefur róast nokkuð, en samt eru fjölmargir skólar hér í mið-Ohio en lokaðir og enn er fólk án rafmagns í dreifbýli. Það á samt ekki við um okkur hér. Skólinn hennar Önnu er opin og það sama á við um Ohio State og Trinity. Halda áfram að lesa: Óveðri slotað

Hér í Bexleybæ er víst mikið óveður og varaði rafmagnsveitan við í gærkvöldi að hugsanlega gæti rafmagnið farið af nágrannabyggðum, jafnvel í nokkra daga. Rafmagnið er nú samt en hjá okkur, en hins vegar eru allir skólar lokaðir. Reyndar var Trinity Lutheran Seminary fyrsta menntastofnunin til að lýsa yfir lokun í dag en tilkynning þeirra kom um kl. 14 í gær. Síðan fylgdu stofnanir og fyrirtæki í mið-Ohio í kjölfarið og listinn lengdist stöðugt í gærkvöldi. Það var síðan í morgun að skólinn hennar Önnu og Ohio State University tilkynntu lokun hjá sér.
Við erum því heima í rólegheitunum og horfum á snjóflygsurnar svífa til jarðar. Snjórinn er samt ekki eina vandamálið, þar sem að alla vega tvisvar á síðustu 12 tímum hefur snjórinn breyst í frosna rigningu, sem hefur lagt klakabrynju yfir snjóinn. Þannig er víst glerhált klakalag neðst, síðan 2-3 tommur af snjó, síðan aftur rennisléttur klakki og síðan ofan á það 3-4 tommur af snjó og enn bætir í.
Tómas er því enn á náttfötunum, Anna í tölvunni, Jenný að læra og ég á vefnum.