Category: 01 Fjölskyldan öll

Við hér á Kapelluhæð óskum lesendum gleðilegra jóla og farsældar á komandi ári. Já, og svo týndi Tómas einni tönn í dag, jóladag. Þetta var fyrsta tönnin sem hann týnir og þó ekki í kökusnúði.

Það er lítið orðið um skrif hér á hrafnar.net en það merkir þó ekki að lítið sé í gangi.

Það hefur mikið gengið á síðustu daga. Anna amma og Binni afi komu í heimsókn og voru með okkur í viku hér á Kapelluhæð að taka úr kössum, skipta um þurrkaratengi, elda, hengja upp myndir og kaupa með okkur húsgögn og eldhústæki svo sitt hvað sé nefnt. Börnin eru bæði byrjuð í skóla, Anna Laufey í Phillips Middle School og Tómas í Raskhis Elementary School. Skólarnir eru báðir í nokkurri fjarlægð og er planið að börnin taki skólabíl á morgnanna, Tómas kl. 7:12 og Anna kl. 7:45. Halda áfram að lesa: Flutningar og útskrift

Það hefur ekki verið skrifað mikið hér á hrafnar.net í sumar, þó ýmislegt hafi gengið á. Ég og börnin vorum á Íslandi í allt sumar, þar sem ég vann í Vatnaskógi og börnin fóru víða og hittu marga ættingja. Á meðan lauk Jenný doktorsverkefninu sínu við The Ohio State University og er núna með réttu kölluð Dr. Jenný í öllum samræðum (eða alla vega sumum). Halda áfram að lesa: Flutningar

Í dag fékk Anna Laufey viðurkenningu frá skólanum sínum og forseta Bandaríkjanna, Barack Obama, fyrir framúrskarandi námsárangur í grunnskóla.

Tómas lék sinn síðasta leik með Grænu drekunum í morgun. Þeir spiluðu við ljósbláa liðið í annað sinn á tímabilinu og að þessu sinni var leikurinn jafnari en síðast. Tómas spilaði með B-liðinu sem tapaði með tveggja marka mun 4-2, en síðast þegar liðin spiluðu hætti ég að telja þegar munurinn var orðin sjö mörk.

Jenný er nefnd á vefsíðu stat.osu.edu vegna verðlaunana sem hún fékk vegna bestu Ph.D. rannsóknarinnar í tölfræði þetta árið við Ohio State.

Þegar ég tengdi símann minn við tölvuna rétt í þessu, sá ég að Tómas hafði tekið nokkrar ljósmyndir á símann í ferðinni til Norður Karólínu. Ég ákvað að útbúa myndband með myndunum. 🙂

Anna Laufey spurði þar sem við horfðum á Villa og Sveppa á Latabæjarhátíðar-DVD: „Eru þessir ekki svona 30 ára? Þeir eru svolítið gamlir til að láta svona.“
Nokkrum mínútum síðar bætti hún við: „Mr. Griffin væri ekki glaður með svona hegðun.“ En Mr. Griffin er kennarinn hennar.
—
‎“There is no such thing as boy colors or girl colors,“ sagði Tómas 5 ára við systur sína fyrir nokkrum dögum, en í gær kvartaði hann síðan sáran yfir hvað sum Valentínusarkortin sem hann fékk frá bekkjarsystrum sínum væru „girly“ og hann vildi ekki eiga þau.

Ég var að spjalla við Tómas um bangsaklukkuna mína sem amma bjó til og gaf mér þegar ég var sex ára. Samtalið endaði var eitthvað á þessa leið:

Ég: Ég fékk klukkuna þegar ég var sex ára svo ég er búin að eiga hana í næstum 30 ár!
Tómas: Nei! I þrettán hundruð ár!

Við óskum lesendum gleðilegra jóla og farsældar á komandi ári.

Nú er útséð um að ég fái vinnu hér í BNA. En leyfi mitt til atvinnuleitar rennur út eftir nokkra daga. Það merkir jafnframt að ég þarf að yfirgefa BNA, þar sem núverandi vegabréfsáritun fellur þar með úr gildi. Ég mun því fljúga til Íslands gegnum Toronto í Kanada aðfararnótt miðvikudagsins 27. október og lenda í Keflavík kl. 6:25.

Ég verð á Íslandi í tvær vikur og tek m.a. tvö fermingarnámskeið í Vatnaskógi. Ég ætla að reyna að funda med fjölmörgu fólki um atvinnu og hitta fjölskylduna.

Ég flýg síðan aftur til BNA 10. nóvember ef allt gengur upp og fer inn í landið med vegabréfsáritun sem maki Jennýjar sem skólinn hennar gefur út, en slík áritun gefur ekki heimild til neinnar vinnu í BNA.

Viðbót: Við fengum staðfest hjá skólanum hennar Jennýjar í gær, að það er líkast til ekki fullnægjandi að fara einfaldlega yfir landamærin til Kanada til að breyta árituninni, ég þarf að fara í sendiráð Bandaríkjanna á Íslandi til að fá nýja áritun.

Dagskráin á Íslandi er strax orðin nokkuð þéttskipuð en endilega finnið tíma til að bjóða mér í mat. 🙂

Í fyrsta leik byrjaði Tómas í C liði þar sem hann var allt í öllu. Í síðustu viku var hann í A liðinu og það gekk öllu verr. Í dag spilaði hann síðan í B liðinu og það verður að segjast að loksins var hann að spila með og við krakka af sama getustigi. Reyndar endaði leikurinn 9-3 fyrir Green Dragons en það gaf ekki endilega rétta mynd af getumuninum. Myndir og myndbönd væntanleg seint í kvöld.

Tómas spilaði sinn fyrsta knattspyrnuleik í dag með græna CESA-soccer liðinu. Það var reyndar smá vesen með að finna út hvaða liði hann ætti að tilheyra og við fengum það ekki staðfest fyrr en seint í gær, sem merkti að hann hafði ekki mætt á neina æfingu fyrir fyrsta leikinn.

Liðinu hans var skipt niður á þrjá velli og spilað þrjú og þrjú á lítil mörk. Þetta leit ekki neitt gífurlega vel út í fyrstu, Tómas sem hafði ekki mætt á neina æfingu og tvær stelpur sem virtust ekki mjög áhugasamar og varamaðurinn þeirra neitaði að vera með. Gula liðið var með þrjá varamenn og ákveðin þjálfara sem reyndi að skipa þeim á svæði á vellinum. Leikurinn byrjaði fremur hægt, þrír grænir krakkar og þrír gulir hlupu þangað sem blár boltinn var hverju sinni og spörkuðu í boltann fremur stefnulaust.

Eftir c.a. tvær mínútur ákvað Tómas síðan að taka leikinn í sínar hendur, náði boltanum sólaði í rólegheitunum alla leikmenn gula liðsins nokkrum sinnum, enda fór hann sér engu óðslega og gekk loksins með boltann inn í mark andstæðinganna. Hann fagnaði árangrinum nokkuð og uppskar mikið hrós enda staðan orðin 1-0. Tómas lét hins vegar ekki þar við sitja, en endurtók leikinn aftur og aftur þar til staðan var orðin líklega um 8-1 fyrir Tómasi og stelpunum tveimur, Þá fór þjálfari hins liðsins fram á það við dómarann að bæta við einum leikmanni í liðið sitt, enda fannst foreldrum gulaliðsmanna fremur leiðinlegt að horfa upp á börnin sín í fyrsta kappleiknum sínum, tapa með þessum hætti. Tómasi hins vegar munaði ekki mikið um að sóla fram hjá einum extra leikmanni og þegar staðan var 10-1, ákvað ég að biðja þjálfara Tómasar um að skipta Tómasi út af og notast við varamann úr græna liðinu sem var á öðrum velli. Við það jafnaðist leikurinn á upphaflega vellinum, en Tómas fékk tækifæri annars staðar.

Það var aðeins meiri mótstaða á nýja vellinum, en Tómas náði samt að setja mark sitt á þann völl einu sinni eða tvisvar, þær fáu mínútur sem hann spilaði þar. Reyndar þurfti dómarinn að stöðva leik einu sinni þar sem honum þótti Tómas helst til ákveðinn gagnvart liðsmanni gula liðsins sem lá eftir á grasinu, en Tómas sýndi mjög góða varnartakta, skýldi boltanum vel og náði ítrekað að stíga sóknarmenn út. Þá átti Tómas ágæta stoðsendingu á liðsfélaga sem skoraði eftir að Tómas hafði náð boltanum af sóknarmanni við hliðarlínu, með því að stíga milli hans og boltans og snúa sér snöggt við á punktinum.

Þá nefndi eitt foreldri nefndi sérstaklega við mig hvernig Tómas hefði hlaupið að félögum sínum í seinni leiknum og „high five-að“ þá þegar þeir skoruðu og sýnt þannig „great sportmanship og team spirit“ sem væri frekar óalgengt í 5-6 ára deildinni.

Alla vega, það er óhætt að segja að innkoma Tómasar á knattspyrnusenuna hafi verið fremur skemmtileg og hann hafi sýnt óvænta takta sem fram til þessa hafa að mestu verið óþekktir.